#চাহ ( খণ্ড-১২ )

#চাহ    ( খণ্ড-১২ )

               ইয়াৰ মাজতে কুন্দনে  ৰুণিমাৰ লগতো কথা পাতিলে ৷ ৰশ্মিৰ খবৰ উলিয়াবলৈ তাই চেষ্টা কৰি থকা বুলি ক’লে ৷ তাইৰ চিনাকি , বৰ্তমান অৱসৰপ্ৰাপ্ত পুলিচৰ কনিষ্টবল এজনৰ পৰা ৰশ্মিৰ দেউতাকৰ নামটো জানিলে ৷ গুৱাহাটীতে  ঘৰ মাটিও কৰিলেগৈ বুলি তেখেতে শুনা পাইছিল ৷ কিন্তু তাতকৈ বেছি একো নাজানে  ৷ হ’লেও তেখেতে ঠিকনাটো বিচাৰি পালেই ৰুণিমাক জনাব ৷ 

            আশাৰ কিৰণ এটা দেখা পোৱা যেন লাগিল কুন্দনৰ ৷ চিকিৎসকৰ লগতে ভগৱানৰ অস্তিত্বৰ  ওপৰতো তাৰ বিশ্বাস আছে ৷ তাৰ বিশ্বাস আৰু ভৰষাৰ মান ৰক্ষা  পৰিব বুলি তাৰ মনটোৱে কৈছে ৷

            মাধৱনে কোৱা লক্ষণবোৰ লাহে লাহে এটা দুটাকৈ যেন ফুটি উঠিছে প্ৰিয়ংকাৰ গাত ৷ মাজতে এদিন ৰাতি একেবাৰেই টোপনি নাহিল তাইৰ ৷ উঠি আহি ঘৰটোত ইফাল সিফাল কৰি কিবাকিবি বিৰবিৰাই থাকিল ৷ তাই নুশুলেে কুন্দন শুৱাৰ প্ৰশ্নই নাহে ৷ ৰাতিপুৱাবৰ সময়তহে তাইৰ টোপনি আহিল ৷ বহুত দেৰিলৈকে শুয়েই থাকিল তাই ৷

             মাধৱনে কথাটো গম পাই কুন্দনক মাতি পঠালে ৷ ইমানদিনে দৰৱ দিয়া নাছিল যদিও এইবাৰ সি দৰৱৰ কথা ক’লে তাক ৷ আচলতে এনে ৰোগত ব্যৱহাৰ হোৱা দৰৱৰ পাৰ্শ্বক্ৰিয়া আছে আৰু দীঘলীয়াকৈ ব্যৱহাৰ কৰিলে আন কিছুমান লক্ষণেও দেখা দিব পাৰে ৷ কিছুমান দৰৱে ৰোগীক অস্বাভাৱিক ভাৱে শৰীৰত চৰ্বি জমা কৰে আৰু তেজৰ চাপ বৃদ্ধি কৰাৰ লগতে শৰীৰত কলেষ্টৰেলৰো মাত্ৰা বৃদ্ধি কৰে ৷ সেয়ে সুষম আহাৰ আৰু শাৰীৰিক ব্যায়াম আদিত গুৰুত্বটো দিবই লাগিব ৷ আকৌ কিছুমান দৰৱ দীৰ্ঘদিন ব্যৱহাৰ কৰি থাকিলে পাছলৈ ৰোগীয়ে  অনৱৰত চকু টিপিয়াই থকা , মুখেৰে কিবা চোবাই থকাৰ দৰে কৰা , কঁপাল কোচাই থকা বা জিভাখন নিজে কব নোৱাৰাকেই বাহিৰলৈ উলিয়াই থকা, এনেধৰণৰ লক্ষণ দেখা পোৱা যায় যিটোক চিকিৎসা বিজ্ঞানত 'Tardive dyskinesia'  বুলি কোৱা হয় ৷

            মাধৱনে প্ৰিয়ংকাক চাইক’থেৰাপি এটা দিয়াৰ কথা ক’লে ৷ যিটো থেৰাপীত তাইক তাইক ৰোগটোৰ বিষয়ে অৱগত কৰি কোনটো সঁচা বা কোনটো সঁচা নহয় , কেনেকৈ চিন্তা আৰু আচৰণ পৰিৱৰ্তন কৰিব পাৰিব আৰু নিজৰ জীৱনটো নিজৰ নিয়ন্ত্ৰণত আনিব পাৰিব তাক জানিবলৈ দিব ৷ তাৰ উপৰিও CBT বা ক’গনিটিভ বিহেভিয়াৰ থেৰাপী আৰু CET বা ক’গনিটিভ এনহেন্সমেন্ট থেৰাপীও এনে ৰোগীক দিয়া হ’য় ৷ CBT দিলে ৰোগীয়ে নিজৰ চিন্তাধাৰা আৰু আচৰণৰ পৰিৱৰ্তন  কৰাত সহায়ক হয় ৷ এইটো থেৰাপীয়ে ৰোগীক কাণেৰে শুনি থকা বিভিন্ন শব্দ আৰু ভ্ৰমৰ পৰা মুক্ত হোৱাটো সহায় কৰে ৷ আকৌ CET য়ে মনোযোগ আৰু স্মৃতি বঢ়াবলৈ শিকোৱাৰ লগতে মানুহৰ দেহভংগীমা, মুখৰ অভিব্যক্তি আদিবোৰ ভালদৰে বুজি পাবলৈ সহায় কৰে ৷ কম্পিউটাৰৰ ওপৰত আধাৰিত মগজুৰ প্ৰশিক্ষণো ইয়াৰ ভিতৰতে পৰে ৷ 

          কুন্দনে মাধৱনৰ কথাবোৰ শুনি শুনি যেন বেলেগ এখন পৃথিৱীলৈহে গুচি গ’ল ! আগতে এইবিষয়ে সি ইমান গম পোৱা নাছিল ৷ আচলতে প্ৰয়োজনো হোৱা নাছিল ৷ প্ৰিয়ংকাৰ বাবে কিন্তু সি এতিয়া এই বিষয়ে জানিবলৈ বহুত আগ্ৰহী ৷

            কুন্দনৰ আগ্ৰহ দেখা পায় মাধৱনে আকৌ বুজাবলৈ লাগিল তাক ৷ এনেধৰণৰ ৰোগীৰ যদি থেৰাপী দিয়াৰ কালচোৱাত অৱস্থাৰ উন্নতি দেখা পোৱা যায় , তেতিয়া আকৌ সেইখিনিতে চাইক’চচিয়েল থেৰাপীৰ কথা আহি যায় ৷ এই থেৰাপীত ৰোগীক চচিয়েল স্কিল ট্ৰেইনিং দিয়া হয় যাতে ৰোগীয়ে সামাজিক আদান প্ৰদান বা যোগাযোগ কৰিবলৈ সহজ হয় ৷ তদুপৰি জব কাউনচেলিঙ, প্ৰব্লেম চলভিংৰ লগতে মানি মেনেজিংৰ ওপৰতো শিক্ষা দিয়া হ’য় যিটোক ৰিহেবিলিটেচন বুলি কোৱা যায় ৷ চচিয়েল ৰিক’ভাৰি থেৰাপীত ৰোগীৰ মনলৈ এক আশাৰ সঞ্চাৰৰ লগতে সকৰাত্মক চিন্তা এটা আনিবলৈও চেষ্টা কৰা হয় ৷