অন্য এক অথেল’ (২৮)

 (২৮)

#অন্য_এক_অথেল’ 

         বিপ্লৱে ফেচ’বুকতেই লগ পাইছিল আকাংক্ষাক৷ প্ৰথমে সাধাৰণ বন্ধুত্ব আৰু তাৰপাছত প্ৰেম৷ পেটে ভাতে খাই থকা ঘৰৰ ল’ৰা আছিল বিপ্লৱ৷ হলেও নিজৰ আৰ্থিক অৱস্থাৰ কথা সি আকাংক্ষাক জানিবলৈ নিদিয়াকৈ কোনোবা বন্ধুৰ ধুনীয়া ঘৰৰ সন্মুখত, কাৰোবাৰ গাড়ীৰ কাষত ৰৈ তোলা ফটোবোৰ আপলোড কৰি সি তাইৰ সম্মুখত এখন আঁৰকাপোৰ সদায়েই ৰাখিছিল৷ কিন্তু প্ৰকৃত প্ৰেমে জানো ধনী দুখীয়াৰ বিচাৰ কৰে! চিৰাচৰিত এই সত্যটো সেই সময়ত সি পাহৰি গৈছিল৷ 

         সহজেই জালত পৰিছিল তাই! সম্পত্তিশালী পিতৃ মাতৃৰ একমাত্ৰ কন্যা আকাংক্ষা৷ তাইক তাৰ জীৱনলৈ আনি ল’ব পাৰিলেই হ’ল৷ বিয়াখন হৈ যোৱাৰ পাছত সম্পৰ্কটো মানি লোৱাৰ বাবে গত্যন্তৰ আছে জানো! তাৰ চেষ্টা সফল হ’বলৈ গৈয়ো আছিল৷ আকাংক্ষা তাৰ সৈতে বিয়াত বহিবলৈ ৰাজী হৈছিল৷ কেণা লগাইছিল মাত্ৰ তাইৰ দেউতাকে৷

        আকাংক্ষাৰ অনুৰোধত সি তাইৰ মাক-দেউতাকক লগ কৰিবলৈ ঘৰ পাইছিলগৈ৷ ইতিমধ্যে বেংকৰ চাকৰিয়াল দিবাকৰ হাজৰিকাৰ সৈতে তাইৰ বিয়াৰ কথা বতৰা চলি আছিল৷ দিবাকৰহঁতৰ ঘৰৰ মানুহ আহি তাইক চাই যোৱাৰ কথা, তাইক পচন্দ কৰাৰ কথা, এইবোৰ সি আকাংক্ষাৰ পৰা গম পাইছিল৷ আকাংক্ষাহঁতৰ প্ৰকাণ্ড লোহাৰ গেটখনৰ সন্মুখত ৰৈ সি চুচুক চামাক কৰিছিল৷ ইস্ত্ৰি কৰি পিন্ধি অহা তাৰ কিছু নতুন হৈ থকা চাৰ্ট পেন্টজোৰৰ সৈতে বিবৰ্ণ জোতাযোৰে যেন তাক উপলুঙা কৰিছিল! 

          তাক দেখি উৎফুল্লিত হৈ পৰা আকাংক্ষাৰ বিপৰীতে দেউতাকৰ কপালখন কোঁচ খাই যোৱা সি মন কৰিছিল৷ মাকে অৱশ্যে স্বাভাৱিকভাবেই মাত বোল কৰিছিল৷ আয়কৰ বিভাগত কৰ্মৰত দেউতাকে বিষয়াৰ গাম্ভীৰ্যৰে তাৰ লগত কিছুসময় অকলে কথা পতাৰ সেই সময়ছোৱাত ডিঙিতো শুকাই শুকাই যোৱা বিপ্লৱে দুগিলাচমান পানী খাইছিল৷ তাৰ ঘৰৰ খা খবৰ, পঢ়া-শুনা, চাকৰি বাকৰিৰ খবৰ লোৱা মানুহজনে তাৰ দেউতাকে শাকপাচলিৰ বেপাৰ কৰে বুলি শুনি ওঁঠত ফুটি উঠা ব্যংগাত্মক হাঁহিটোৱে গাটো জ্বলাই পেলাইছিল তাৰ৷ দিবাকৰৰ লগত আকাংক্ষাৰ বিয়া ঠিক হোৱাৰ খবৰ দি প্ৰকাৰন্তৰে তাক তেওঁৰ সিদ্ধান্ত জনাই দিছিল৷ আকাংক্ষাই জোৰ কৰাৰ পাছতো চাহ খাবলৈ নৰৈ সি গুচি আহিছিল৷ অপমানিত অনুভৱ কৰা বিপ্লৱে নিজৰ ওচৰতে ছলে বলে কৌশলে হ’লেও আকাংক্ষাক নিজৰ কৰি লোৱাৰ প্ৰতিজ্ঞাবদ্ধ হৈছিল৷

          তাৰ পাচৰেপৰা কিন্তু আকাংক্ষাই তাৰ ফোন ৰিচিভ কৰিবলৈ বাদ দিছিল৷ সম্ভৱতঃ দেউতাকৰ বুজনি কামত আহিছিল৷ হলেও সি চেষ্টা এৰি দিয়া নাছিল৷ আৰু অৱশেষত সফল হৈছিল সি৷ আকাংক্ষা তাৰ লগত গুচি অহাৰ পাছত, তাইৰ দেউতাকৰ ক’লাপৰা মুখখন মনলৈ আনি সি যুদ্ধজয়ৰ আনন্দত মতলীয়া হৈছিল৷ তাইক কষ্ট দি সি সুখ অনুভৱ কৰিছিল৷ তাইৰ প্ৰতিটো চিৎকাৰত এক অদ্ভুত সুখানুভূতিৰে ভৰি পৰিছিল তাৰ মন৷ তাৰ লগত গুচি আহিল যেতিয়া তাই তাৰ সম্পত্তি৷ কিমান কষ্ট কৰিলে সি তাইৰ মনত প্ৰভাৱ বিস্তাৰ কৰিবলৈ! নিজকে ক’ত বেলেগ বেলেগ কৌশলেৰে জাহিৰ কৰিলে! সাধাৰণ ছোৱালী এজনীক কাবু কৰিব নোৱাৰিলে ক’ত তাৰ পুৰুষত্ব? বিপ্লৱৰ দৰে একাংশ মানুহে নাৰীক নাৰী বুলিয়েই হেয় কৰিবলৈ বিচাৰে৷ নাৰীক পুৰুষতকৈ ওপৰলৈ যাবলৈ কেতিয়াও দিব নোৱাৰে৷ কেৱল পুৰুষ হোৱাৰ বাবেই সাংঘাতিক উচ্চাত্মিকাবোধত ভোগা বিপ্লৱে নাজানে তাৰ দৰে পুৰুষবোৰক কি কয়!

'মেল ছভিনিষ্ট পিগ'- এইবুলিয়েই মালিকনী বাইদেৱে কোৱা শুনিছিল সি! 

          বিপ্লৱে বস্তু বাঢ়নীকেইটা পেকিং কৰি পেলাইছিল৷ আকাংক্ষা ইতিমধ্যে গুচি গৈছে৷ কলৈ যাবগৈ সি নাজানে, মানে আকাংক্ষাই কোৱাৰ প্ৰয়োজন অনুভৱ নকৰিলে৷ তাইক থাকিবলৈ কোৱাৰ অধিকাৰ সি হেৰুৱাই পেলাইছে বুলিও বুজি পালে৷ ঘৰৰ মালিকনী বাইদেৱেও সি আৰু তাত থকাটো বিচৰা নাই৷ সেয়ে সি অফিচৰ কাষতে লজ এটা ঠিক কৰিছে৷ 

"টিইইইইত, টিইইইত৷"

গেটৰ সন্মুখত গাড়ীৰ হৰ্ণ বাজিল৷ সি মাতি থৈ অহা গাড়ীখন পালেহি৷ লামলাকটু কেইটা নিবলৈ সি ড্ৰাইভাৰজনক মাতিবলৈ ওলাই গ’ল৷  

/p>

আগলৈ