অন্য এক অথেল’ (৪৪)

 (৪৪)

#অন্য_এক_অথেল’

        ৰাতিপুৱা গাখীৰেৰে সৈতে চুজী ভাজি ব্ৰেকফাষ্ট কৰাৰ পাছত  মাইচেনাই ডাঙৰকেইটাক স্কুললৈ পঠাই ৰান্ধনী বাইদেউৰ সৈতে পাকঘৰৰ কামত লাগি দিছে৷ ৰাবিয়া কামলৈ অহা নাই আজি৷ তাইৰ ফোনো পোৱা নাই৷ সেয়ে ৰান্ধনী বাইদেউৰ অকলে অসুবিধা হয় বুলি মাইচেনা পাকঘৰত লাগি দিছেগৈ৷ আকাংক্ষাই সৰুকেইটাইৰ লগত লাগি আছে৷ সিহঁতক ব্যস্ত ৰাখিবলৈ তাই কুইলিং আৰ্টত কৰাৰ দৰে দীঘলীয়াকৈ ফিটাৰ দৰে কাগজ কাটি কাটি বিভিন্ন ধৰণে নুৰিয়াই, ভাজ কৰি ফুল, পখিলা এইবোৰ সাজি দেখুৱাইছে৷ 

"পখিলোটো কিন্তু মোৰ দেই৷" বাৰ্বীয়ে আগতিয়াকৈ কৈ থৈছে৷  

"মোকো লাগিব৷"

"আমাকো লাগিব৷" - ইটোক দেখি সিটোৱেও কৈছে৷ 

"দিম, দিম৷ আটাইকেইটাকে দিম দেই৷ এটা এটাকৈ৷"

"কি সাজিছা আকাংক্ষা? চাওঁ, বৰ বেলেগ ষ্টাইলত সাজিলা দেখোন!"

মাইচেনাই মাজতে এবাৰ আহি চাই সুধি গ’লহি৷

"এইটোক কুইলিং আৰ্ট বুলি কয় মাইচেনা বাইদেউ৷  আচলতে এইবোৰ সাজিবলৈ বেলেগ ধৰণৰ কাগজ এটা কিনিবলৈ পায়৷ সেইটোৰে সাজিলে বৰ ধুনীয়া হয়৷ মই ইহঁতক ব্যস্ত ৰাখিবলৈ এনেয়ে এইবোৰ কৰি আছোঁ৷"

আকাংক্ষাই কাগজ কাটি কাটি উত্তৰ দিলে৷

"এনেকৈয়ো বৰ ধুনীয়া হৈছে কিন্তু৷ বাৰু ৰাবিয়াৰ ফোনটো আকৌ লগাই চাইছিলানে? কি বা হ’ল এইজনীৰ! আনকালে এনেকৈ খবৰ নিদিয়াকৈ এদিনো থকা নাই৷"

মাইচেনাই চিন্তিত সুৰত ক’লে৷

"কৰিছিলোঁ৷ ৰাবিয়াবাইৰ ফোনটো চুইচড্ অফ্ পাই আছোঁ৷"

"তাকেহে চিন্তা কৰিছোঁ৷ গা চা য়েই বেয়া নেকি! পাচবেলালৈ নহলে টেগবাহাদুৰকে খবৰ এটা লৈ আহিবলৈ পঠিয়াব লাগিব৷"

কৈ কৈ মাইচেনা পাকঘৰলৈ গ’ল৷ আশ্ৰমৰপৰা এক কিলোমিটাৰমান আঁতৰত ভাৰাঘৰ এটাত থাকে ৰাবিয়াহঁতৰ পৰিয়ালটো৷ ছোৱালীজনী এইবাৰ কলেজলৈ গৈছে, ল’ৰাটো ক্লাচ চিক্সত৷ মানুহটোৱে অত ত’ত পেইণ্টৰ কাম কৰে৷ নিশ্চয় তাইৰ কিবা বিপদ হৈছে! নহ’লে নহাকৈ নাথাকে তাই৷ পিছে সিহঁতে কথা পতাৰ অলপপৰ পাছতেই ৰাবিয়া আহি ওলাল৷ আনকালে পৰিপাটিকৈ শাড়ীখন পিন্ধি অহা ৰাবিয়াৰ আজি শাড়ী পিন্ধাৰ ঢং নাই৷ চুলিও অবিন্যস্ত৷ তাই আহি মাইচেনাক বিছাৰি চিধাই পাকঘৰ পালেগৈ৷ কিবা এটা অনুমান কৰি আকাংক্ষাও তাইৰ পাছে পাছে পাকঘৰ পালেগৈ৷

"কি হ’ল ৰাবিয়া৷ ইমান ফোন কৰি আছোঁ তোক৷ ফোনো নাই, খবৰো নাই৷ গা বেয়া নেকি কাৰোবাৰ?"

"কি কম বাইটি৷ মফিদা ডাঙৰ বিপদ এটাত পৰিছে৷"

মূৰে কপালে হাত দি তাই মজিয়াতে লেপেটা কাঢ়ি বহি দিলে৷ মফিদা তাইৰ ছোৱালীজনীৰ নাম৷

" কি হ’ল মফিদাৰ? ভালকৈ কচোন কথাটো৷"

মাইচেনাই উদ্বিগ্ন হৈ সুধিলে৷

"কোনোবা ল’ৰা এটাই তাইক অকলে লগ কৰিবলৈ মাতি আছে৷ নহ’লে তাইৰ কানি কাপোৰ নথকা ফটো হেনো নেটত দি তাইৰ বদনাম কৰি দিব৷" 

কৈ কৈ ৰাবিয়াই কান্দিবলৈ লাগিল৷

"ৰহচোন নাকান্দিবি৷ ক’ৰ ল’ৰা সেইটো৷ কিবা গম পাৱনে?"

"মোবাইল ফোনত চিনাকি হোৱা ল’ৰা হেনো৷ তাইৰ লগত ফোনত কথা পাতি পাতি ফটো খুজিলে৷"

"তাইনো তেনেকুৱা ফটো ল’ৰাটোলৈ কেলৈ দিছিল অ'৷"

মাইচেনাই কথাটো শুনি যেন নিজেই লাজ পালে৷

"তাই কৈছে তেনেকুৱা কানি কাপোৰ নথকা ফটো তাই ল’ৰাটোলৈ দিয়া নাছিল৷ তাই কচম খাই কৈছে মোক৷"

"আজিকালি তেনেকুৱা ফটো কম্পিউটাৰতো বনাব পাৰি৷ ল’ৰাটোৱে তাইক ব্লেকমেইলিং কৰিছে ৰাবিয়া বাই৷"

এইবাৰ আকাংক্ষাই ক’লে৷ 

"এনেকুৱা ল’ৰাক পুলিচত দিব লাগে৷ শিক্ষা এটা পাব তেতিয়া৷ অৱন্তিকা বাইদেউক ফোন কৰিব লাগিব ৰহ৷ বাইদেৱে উপায় এটা দিব৷"

মাইচেনাই আকাংক্ষাক  অৱন্তিকা বাইদেউলৈ ফোনটো লগাবলৈ ক’লে৷ তেখেত আধাঘণ্টামানৰ পাছতে আহি পালেহি৷ ৰাবিয়া বাইদেউৰ বাবে ৰৈয়েই আছিল৷

"বাইদেউ৷ কিবা এটা কৰক৷ ছোৱালীজনীক উদ্ধাৰ কৰক৷"

"সোনকালেই কথাবোৰ পুলিচক জনাব লাগিব৷ তেতিয়াহে ইহঁতক ধৰিব পাৰিব৷"

অৱন্তিকা বাইদেৱে কথাবোৰ শুনি ৰায় দিলে৷

"বাইদেউ, পুলিচৰ ওচৰলৈ গলে ছোৱালীজনী বদনামী হৈ নাযাব জানো!"

ৰাবিয়াই ভয়ে ভয়ে ক’লে৷

"বদনামলৈ ভয় কৰি অপৰাধীক প্ৰশ্চয় দিলে নহ’ব৷ আৰু তোৰ ছোৱালীজনীও ধোৱা তুলসীৰ পাত নহয়৷ অচিন কাঠৰ থোঁৰা লগাবলৈ কিহে পাইছিল তাইক? আৰু আজি সিহঁতকেইটা ধৰা নপৰিলে কাইলৈ আৰু কাৰোবাৰ সৈতে এনে কৰিব৷ এনেকুৱা অপৰাধ নিতৌ হৈয়েই আছে৷ কথাবোৰ লুকুৱাই নথৈ যদি মানুহবোৰে সাহস দেখুৱাই তেতিয়াহে এনেবোৰ অপৰাধী নিৰ্মূল হ’বগৈ৷"

"কি নাম ল’ৰাটোৰ?"

মাইচেনাৰ প্ৰশ্নটোৰ অৰ্থ ধৰিব পাৰিলে অৱন্তিকা বাইদেৱে৷ তাই আওপকীয়াকৈ ল’ৰাটোৰ ধৰ্মৰ কথা জানিব খুজিছে৷

"নাম যিয়েই নহওক, আমাৰ বাবে সি মাথোঁঁ অপৰাধী৷" 

 

অৱন্তিকা বাইদেউৰ কথাত সিহঁত মনে মনে ৰ’ল৷ সঁচাকৈয়ে জাতি, ধৰ্ম, বৰ্ণ, লিংগ নিৰ্বিশেষে অপৰাধী অপৰাধীয়েই৷ মাইছেনা বাইদেউ আৰু টেগবাহাদুৰক দুই এটা নিৰ্দেশ দি অৱন্তিকা বাইদেউ ৰাবিয়াক লৈ ওলায় গ’ল৷ 

"কালি টাউনতো পুলিচে ল’ৰাকেইটামান ধৰিছে নহয়৷ কিবা ব্লেকমেইলিংৰ কেচ হেনো৷ নিউ জুয়েলাৰীৰ মালিকক ছোৱালী এজনীয়ে ফঁচাই পইচা ডিমাণ্ড কৰিছিলে৷ পিছে মালিকে পুলিচত খবৰ দি সিহঁতকধৰাই দিলে৷"

টেগবাহাদুৰে মাইচেনাহঁতক উদ্দেশ্যি ক’লে৷

"হয় অ'৷ আজিকালি কিছুমানক অকল পইচাহে লাগে৷ যি কোনো প্ৰকাৰেই নহওক কিয়৷"

মাইচেনাই লাহেকৈ কৈ উঠিল৷ 

"টি ভিটো লগাবচোন বাইদেউ৷ তাত দি থাকিব পায়৷ মই অথনি জুয়েলাৰীৰ আগত কেমেৰামেন দেখি আহিছোঁ৷"

টেগবাহাদুৰৰ কথাত মাইচেনাই খোৱা ঘৰৰ এচুকত থকা টিভিটো খুলি দিলেগৈ৷ আকাংক্ষা আৰু টেগবাহাদুৰৰ লগতে ৰান্ধনী বাইদেৱো চাবলৈ আহিল৷ মিছা নহয়৷ হানি ট্ৰেপিংৰ ঘটনা৷ টিভিত সাংবাদিকে  জুয়েলাৰীখন দেখুৱাই ঘটনাটো বৰ্ণনা কৰি আছে৷ ইজিমানীৰ লোভত পৰি ৰঙাঘৰৰ আলহী হ’বলগীয়া হোৱা ল’ৰাকেইজনৰ নামকেইটাও চিঞৰি চিঞৰি কৈ আছে৷ চাৰিটা ল’ৰাৰ লগতে ছোৱালী দুজনীও আটক কৰিছে৷ ৰবীন সিং, আশুতোষ ঘোষ, মইনুল মণ্ডল, বিপ্লৱ ফুকন, সুৰেখা বিবি আৰু পামেলা ওৰফে মিলি৷

বিপ্লৱ ফুকন! আকাংক্ষাৰ গাটো জিকাৰ খাই উঠিল৷ এই বিপ্লৱ সেইটো বিপ্লৱনে? চকুকেইটা টিভিৰ স্ক্ৰীণখনত আঠা লগাই বহি থাকিল তাই৷ আৰু তাইৰ অনুমান সত্য প্ৰতিপন্ন কৰি টি ভিত আনকেইটা ল’ৰাৰ লগতে বিপ্লৱৰ মুখখন ভাঁহি উঠিল৷

আগলৈ